МОСКВА, 20-июн. — Sputnik, Мария Шелудякова. Россиянын президенти Владимир Путин Кыргызстандын өлкө башчысы Алмазбек Атамбаев менен болгон жолугушуу учурунда Кыргызстанда кырдаал жөнгө салынып, мамлекет өнүгүү жолуна түшкөнүн баса белгиледи.
Кремлде Атамбаев менен Путиндин чакан чөйрөдөгү жолугушуусу башталды. Сүйлөшүүнүн алдында өлкө башчылары салтанаттуу түрдө Кремлдин Георгиев залына чыгып, музыканын коштоосунда учурашып, андан соң эки өлкөнүн гимндери жаңырды.
"Бүгүнкү күнү биз аймактык, эл аралык маселелерди талкуулай алабыз. Эки өлкөнүн мамилесин өнүктүрүү боюнча чакан жана кенен чөйрөдө да кесиптештер менен сүйлөшүүгө жол ачылды ", — деди Путин.
Өз кезегинде Атамбаев президенттердин кечээки бейрасмий жолугушуусунда толук жыйынтык чыгарууга мүмкүнчүлүк болгонун айтты.
"Менин кызматтан кетээриме деле аз убакыт калды. Бирок Кыргызстан Россия менен ушундай эле мамиледе каларына ишендирип өтөйүн",— деди Атамбаев.
КР өлкө башчысы өзүнүн президент болуп турган убагында негизги жумушу катары "Россия менен бир туугандык алаканы чыңдоо" болгонун кошумчалады.
Маалым болгондой сүйлөшүү учурунда тараптар эки өлкө ортосундагы негизги маселелерге токтолуп, саясий, соода-экономикалык, маданий жана илимий жактан кызматташтыкты өнүктүрүү тууралуу кеп козгошот.
Эскерте кетсек, Атамбаев Россияга мамлекеттик сапары менен 19-июнь күнү учуп кеткен.
