БИШКЕК, 1-июн. — Sputnik. Кадамжайда классташын өлтүрүүгө айыпталган 15 жаштагы өспүрүм 10 жылга эркинен ажыратылды. Бул тууралуу аймактык кабарчы Кадамжай райондук сотуна шилтеме берип билдирди.
Маалыматка ылайык, Марказ айыл аймагындагы 8-класстын М.А. аттуу окуучусу өзүнүн Ж.Э. деген классташынын 4400 сомдук уюлдук аппаратын уурдап алган.
"Телефонун уурдаткан бала классташы баарын мойнуна албаса, милицияга кабарлай турганын билдирген. Анын мындай кебинен чочулаган өспүрүм меселени чечүү үчүн классташын Көк-Талаа айылынын күн батыш тарабындагы үлүш жерге ээрчитип барган. Ал жерде чыр чыгып, М.А. курбусун таш менен уруп өлтүрүп, сөөгүн жүгөрүнүн арасына жашырып койгон", — деп айтылат маалыматта.
Каза болгон баланын сөөгү үстүбүздөгү жылдын 5-февралында табылган. Анын өлүмүнө шектелип классташы кармалган болчу. Айыпталган баланын атасы каза болуп калган. Ал эми апасы Москва шаарында иштейт.
