БИШКЕК, 19-май. — Sputnik. Мексикада куралчан үч адам Акапулько шаарынан Мехикого келе жаткан 29 полиция кызматкерин тоноп кетти. Бул тууралуу РИА Новости агенттиги Universal басылмасына таянып кабарлады.
Маалыматка ылайык, Акапулько шаарынын федералдык полиция кызматкерлери дүйшөмбү күнү кечинде Мехикого туристтик автобус менен келе жатышкан. Алардын эч кимисинин жанында курал-жарак болгон эмес.
Жолдон автобус бузулуп, айдоочу унааны токтотууга аргасыз болгон. Бул учурду кылмышкерлер колдонуп полиция кызматкерлерине курал такап, алардын кол саатын, чөнтөк телефонун жана баштыктарын алып кетишкен.
Окуядан полиция кызматкерлери жабыркаган эмес. Коопсуздук боюнча улуттук комиссия кол салгандарга карата иликтөө иштерин жүргүзөт.
