БИШКЕК, 19 май — Sputnik. Кыргызстандык модель Айсулуу Абдыбакасова эл аралык масштабдагы сулуулар сынагына катышат.
"КМШ сулуусу — 2017" сынагы КМШ мамлекеттер аралык комитети, Еревандын экономика министрлиги жана Ереван шаарынын мэриясынын колдоосунун негизинде өткөрүлөт.
Кыргызстандын намысын коргой турган Айсулуу Абдыбакасова үч кыздын арасынан тандалган.
"Сулууларды тандап жатканда алардын тажрыйбасына көңүл бурулду. Натыйжада көрсөтүлгөн үч бийкечтин ичинен Айсулуу Абдыбакасованы тандап алдык", — деп "КМШ сулуусу" сынагынын уюштуруучусу Наири Мнацаканян билдирди.
Сынакка 13 мамлекеттин сулуулары катышат. Байге фонду 340 миң долларды түзөт.
Мнацаканяндын айтымына караганда, катышуучулар Арменияга 25-майда келип, эки жума бою ар кандай семинарларга жана көргөзмөлөргө катышып, шаар кыдырышат. Сынактын финалдык бөлүгү 6-июнда өтөт.
