БИШКЕК, 12-май — Sputnik. Индияда өтүп жаткан Азия чемпионатында грек-рим күрөшү боюнча Кырызстандын байге куржуну дагы бир коло медаль менен толукталды. Бул тууралуу Күрөш бириккен дүйнөсүнүн расмий сайтында жарыяланды.
Медалга 71 килограммга чейин салмак категориясында ат салышкан балбан Нургазы Асангулов ээ болду. Алгач кытайлык спортчу Худжюн Цангды жеңип алса, жарым финалдык беттеште ирандык Афшин Бьянбангардудан утулуп калган. Үчүнчү орун үчүн болгон кармашууда индиялык балбанды 8:1 эсеби менен артка таштады.
Эскерте кетсек, буга чейин 80 килограммга чейинки салмак категориясында күч сынашкан Самат Шырдаков да коло медаль тагынып, байгенин эсебин ачкан.
Чемпионаттын акыркы күнү кыз-келиндер арасында мелдеш өтүп, өлкө намысын Саяна Баизова, Розалия Тилегенова жана Назира Марсбек кызы коргомокчу.
