БИШКЕК, 9-май. — Sputnik. Жээктеги пансионаттар эми Ысык-Көлдүн түбүндөгү таштандыларды милдеттүү түрдө алып чыгат.
Мындай милдетти Экологиялык жана Техникалык коопсуздук боюнча мамлекеттик инспекциясы чарбалык жайлардын 2017-жылдагы планына кошо бекитти. Анда конок үйлөр көлдүн жака-белин ар кыл акыр-чикирлерден тазалаш керектиги жазылган.
Андан сырткары, документте пансионаттар ыплас сууларды тазалоочу курулуштар жана канализациялык тармак менен сөзсүз түрдө камсыздашы керек.
Алар өздөрүнүн насостук станциясын жана канализациялык системасын да ылай суулардан тазалашы керек. Аймагына таштанды челектерди орнотуу туурасында да өзүнчө пункт менен белгиленген.
Эс алуучуларды кабыл алгандар көлдүн жээгиндеги тартипти сактап, таштандылардан улам арылтып турушу зарыл.
