Назым Мендебаиров: "Кара жолтойдун" сценарийи менен таанышкан эмесмин
Популярдуулук алып келген "Кара жолтой" тасмасына тартылаарда сценарийи менен таанышкан эмесмин. Бул тууралуу Назым Мендебаиров Sputnik Кыргызстан агенттигине берген маегинде айтып берди.
"Бул ролго тартылар-тартылбасымды билчү эмесмин. Тасманын режиссеру Мурат Мамбетов "сага жакшы роль бар эле, чачыңды кыскартпай турчу" деп калды. Эмгек өргүүсүндө жүргөн маалда мени издеп калыптыр. Анан мени базарга алып барып капюшону бар эки кара куртка, футболка, шым, туфли алып беришти. Мен болсо кийим алып берип жатышат деп жүрө бердим. Мурат байкеге "мен киммин" десем, "киши өлтүрөсүң" деп аягына чейин сценарий менен тааныштырган жок", — деди актер.
