БИШКЕК, 24-мар. — Sputnik. Депутат Жанар Акаевди КСДП фракциясы бүгүн катарынан чыгарды. Бул тууралуу Иса Өмүркулов журналисттерге билдирди.
"Жанар Акаевдин көз карашы фракцияныкына туура келбей калды. Бул маселе бүгүн эле чыккан жок, көптөн бери келе жаткан. Фракция менен көз карашы туура келбей жатса, өзү эле чыгып кеткени жакшы го. Саясий кеңештин чечимин фракция колдоду. Ал эми депутаттык мандатына кол тийгизүүгө биздин укугубуз жок", — деди Өмүркулов.
Буга чейин партиянын саясий кеңеши жаш депутатты партиянын катарынан чыгаруу чечимин кабыл алган болчу.
Жанар Акаев өзү аны мүчө болгон бардык депутаттык комиссиялардан чыгаруу маселеси дагы колдоо тапканын айтты.
Ал ошондой эле мындан ары парламентте эркин депутат болуп каларын белгиледи.
Жанар Акаев 2015-жылы 4-октябрда Жогорку Кеңешке болгон шайлоодо КСДП фракциясынын тизмеси менен депутат болуп келген. Ал тизме боюнча жетинчи катарда болчу.
Депутат болгонго чейин "Азаттык" радиосунун журналисти, 2015-жылы февраль айынан августка чейин президент Алмазбек Атамбаевдин маалымат катчысы болуп иштеген.
