БИШКЕК, 14-мар. — Sputnik. Жүк ташуучу учак кулап түшкөн Дача айылынын 100дөй тургуну бийликке компенсация төлөп берүүнү эртелетүү жана элди башка жакка көчүрүү талаптарын коюп митингге чыгышты.
Чогулган эл менен Чүй облусунун башчысы Бактыбек Кудайбергенов, Сокулук районунун акими Болот Сатыкеев, Новопавловка айыл өкмөтүнүн башчысы Улан Садалиев баштаган аткаминерлер жолукту.
Акциянын катышуучулары каражатты өкмөт бербей жатканын айтышты. Өз кезегинде Сокулук районунун акими Болот Сатыкеев бардыгы ачык жана мыйзамдуу жол менен бөлүнөрүн билдирип, элди сабырдуулукка чакырды.
Дача айылынын тургундарынын көбү башка жакка эртерээк көчүп кетүүгө ниеттенүүдө. Жергиликтүү тургун Малика Үсөнованын айтымында Дача айылынын тургундарынын көбү ушул эле аймактагы башка жерлерге көчүүгө макул.
"Тургундардын көпчүлүгү шаарда жана "Манас" аэропортунда иштешет. Балдарыбыз дагы Манас айылындагы мектепке барып окушат. Бизге ушул тараптан деле жер берилсе жакшы болот эле. Бул жакка көнүп калганбыз да", — деди ал.
Жергиликтүү тургундардын айтымында, Дача айылынан 400дөн ашык жер тилкеси берилген жана анын жалпы аянты 30 гектардын тегерегинде.
Белгилей кетсек, "Манас" аэропортуна жакын жердеги Дача айылына 16-январдын таңында жүк ташуучу Boeing-747 учагы кулап, 39 кишинин өмүрүн алган. Каргашалуу окуядан кийин банктан атайын эсеп ачылып, акыркы маалыматтар боюнча ага 100 миллион сомдой каражат чогулган.
