БИШКЕК, 20-фев. — Sputnik. Биринчи вице-премьер Мухамметкалый Абулгазиев Boeing-747 учагы кулаган Дача айылына барып андагы тургундар менен жолугушуу өткөргөнүн өкмөттүн маалымат кызматынан кабарлашты.
Жолугушуу куран окутуу менен башталып, Абулгазиев тургундарга авиакырсыктын чыгымдары эсептелип бүткөнүн билдирген.
"Кыргызстан түрк тарапка чыгымдардын суммасын көрсөткөн расмий кат жиберди. Биздин эсеп боюнча чыгымдардын жалпы көлөмү 195 миллион сомду түздү. Түрк тарап башынан эле биздин катты окуп чыгууга жана жардам көрсөтүүгө даяр экендиктерин билдирген. Алар ошондой эле ата-энесиз калган эки баланын билим алуусун каржыламай болушкан", — деди атка минер.
Биринчи вице-премьер жарандарды компенсация төлөттүрүү боюнча юридикалык жардам сунуштаган тараптардан оолак болууга чакырды.
Ал ошондой эле ӨКМдин атайын эсебине дагы 91 миллион сом чогулганын билдирип, жарандар турак үйлүү болушаарын кошумчалаган.
Белгилей кетсек, 16-январда "Манас" аэропортуна жакын жердеги Дача айылына Boeing 747 учагы кулап, 39 кишинин өмүрүн алган. Анын ичинде экипаждын 4 мүчөсү да болгон.
