БИШКЕК, 12-мар. — Sputnik. Чүй жана Ысык-Көл облустарындагы 16 мектептин башталгыч класстарынын беш миң окуучусуна жума сайын ысык тамак берилип турат. Бул тууралуу Билим берүү жана илим министрлигинин маалымат кызматы кабарлады.
Билдирүүгө ылайык, министрлик БУУнун бүткүл дүйнөлүк азык-түлүк программасы менен биргеликте пилоттук долбоорду ишке киргизип, ага 266 окуу борборлору кирген. Япония бул демилгени колдоо иретинде грант бөлгөн.
"Берилген каражатка мектептеги ашканаларга электр меши, нан бышыргыч, муздаткыч өңдүү заманбап техникалар алынат", — деп жазылат маалыматта.
Министрликтин маалыматына караганда, мектептерге тамак берүүнү оптималдаштыруу долбоору өзүнө башталгыч класстардын 180 миң окуучусун камтыйт. Донорлордун колдоосунун арты менен аталган долбоорго катышып жаткан окуу мекемелеринин саны улам өсүүдө.
