БИШКЕК, 28-янв. — Sputnik. Баш мыйзамдын жаңы тексти жарыяланган "Эркин-Тоо" гезитинин атайын чыгарылышы басылып чыкты. Бул тууралуу Sputnik Кыргызстан агенттигине аталган гезиттин редакциясынан билдиришти.
Жума күнү президент Алмазбек Атамбаев КР Конституциясынын расмий текстин жарыялоо жөнүндө Жарлыкка кол койгон. Өлкө башчынын айтымында, Баш мыйзамдын түп нускасы президенттик аппаратта сакталып, көчүрмөлөрү өкмөткө, Жогорку Кеңешке, Жогорку сотко жана Конституциялык палатага берилет.
"Гезит кыргыз жана орус тилдеринде 6 миң нуска менен чыкты", — деп билдирди басылма.
Өзгөртүүлөрдүн максаты — эгемендүүлүктү, суверенитетти, парламентаризмди бекемдөө, мамлекеттик бийликтин мыйзам чыгаруучу жана аткаруучу бутактарынын иштешүү принциптерин так аныктоо болуп эсептелет. Мындан тышкары, Баш мыйзам сот системасы менен укук коргоо органдарына реформа жүргүзүүнү улантууга шарт түзүүсү керек.
