Кыргызстандын мектептери беш күндүк тартипке өтөт
БИШКЕК, 13-янв. — Sputnik. Кыргызстандагы мектептер 2016-2017-окуу жылынын экинчи жарым жылдыгынан тарта беш күндүк тартипке өтүү боюнча буйрук чыкканын Билим берүү жана илим министрлиги билдирди.
9 Үчтүн айы 2017, 14:37
Маалыматка ылайык, базистик окуу планы менен окуган, бир жумадагы сабактар 30 сааттан ашпаган бардык мектептер беш күндүк тартипке өтөт. Бирок статусу бар лицей, гимназиялар, окуу комплекстери алты күндүк тартипте окуйт. Бул айырмачылыктарды Билим берүү жана илим министрлигинин мектепке чейинки, мектепте, мектептен тышкаркы билим берүү башкармалыгынын жетектөөчү адиси Самаркүл Умралиева мындайча түшүндүрдү.
"КР өкмөтүнүн 403-токтомуна өзгөртүүлөр киргизилгендиктен быйылкы окуу жылынын экинчи жарым жылдыгында окуучулардын жумалык окуу жүктөмүнө өзгөртүүлөр киргизилди. Окуу процесси төмөнкүдөй тартипте жүргүзүлөт. Эгерде мектеп базистик окуу план менен иштеп, жумалык жүктөмү 30 сааттан ашпаса алар 5 күндүк тартипке өтөт. Ал эми бир жумалык окуу жүктөмү 30 сааттан ашса, анда окуучулардын санитардык-гигиеналык режимин сактоо үчүн алты күндүк тартипке өткөрүлдү", — деди Умралиева.
Талап боюнча санитардык гигиеналык режим 5-6 сааттан ашпашы керек шарт.
