БИШКЕК, 4-янв. — Sputnik. Жалал-Абадда милиция кызматкерине кол көтөргөн эркек киши жана анын баласы кармалды. Бул тууралуу Жалал-Абад ОИИБ маалымат кызматы билдирди.
Ага ылайык, 2-январда кечки саат 18:00дө "102" кызматына мончодо бир адам сабалып жатканы тууралуу билдирүү түшүп, окуя болгон жерге эки аймактык милиционер барат.
Мончо ээси 40 жаштагы адам спирт ичимдигин ичип алып милиция кызматкерлерине оозго алгыс сөздөрдү айтып, мончого киргизбей койгон.
"Ушул учурда жаш бала милиционерлердин бирөөсүн башка чаап жиберген. Ал мончо ээсинин уулу болуп чыккан", — деп жазылат маалыматта.
Бийлик өкүлүнө кол көтөргөнү жана милиция кызматкерлеринин ишине тоскоолдук жаратканы үчүн мончо ээси уулу менен кармалып, кылмыш иши козголгон.
Учурда тергөө иштери жүрүүдө.
