Прокуратура "Ош" базардагы өлгөн малдын эти боюнча кылмыш ишин козгоду

БИШКЕК, 30-дек. — Sputnik. Арам өлгөн малдын этин сатуу жана ага чоңдордун катыштыгы тууралуу маалыматтар боюнча Бишкек прокуратурасы текшерүү иштерин жүргүзгөнүн аталган органдын маалымат кызматынан билдиришти. 

Эске салсак, ушул жылдын 13-декабрь күнү "Ош" базарында өлгөн малдын эти сатылганы боюнча КТРКнын кабарчылары журналисттик иликтөө кылышкан. Алардын айтымында, базарда сапатсыз эт саткан соодагерлердин тобу иштеп келет. Журналисттер аталган топ сапатсыз эт менен тез татым жайларын жана колбаса цехтерин камсыздап келерин белгилешкен.

Бул факт боюнча Бишкек шаардык прокуратурасы КРдин Кылмыш жана жаза кодексинин 166 (Алдамчылык) жана 180 (Мыйзамсыз ишкердик кылуу) беренелеринин негизинде кылмыш ишин козгоду. Муну менен катар Бишкек шаарынын Ленин райондук ИИБдин ыкчам тобунун кызматкерлери 304-берене (Кызматтык абалынан кыянаттык менен пайдалануу) менен айыпталды. Маалыматта караганда, аталган кызмат адамдары бир нече ирет өз кызыкчылыгын көздөп, мыйзамсыз соода кылгандарга бөгөт коюуга аракет кылган эмес.

Учурда козголгон кылмыш иштери боюнча иликтөөлөр уланууда.

Ошондой эле Бишкек прокуратурасы өкмөттүн Ветеринардык жана фитосанитардык коопсуздук боюнча мамлекеттик инспекциясынын директору Калысбек Жумакановго мыйзам бузуу иштерин жоюу боюнча сунуш каты жолдонду.