Мөөнөтү өтүп кеткен йогурттар. Сокулуктун базарлары текшерилди

БИШКЕК, 28-дек. — Sputnik. Сокулук районундагы "Жибек Жолу" борбордук базарында мөөнөтү өтүп кеткен йогурттар сатыла турганы аныкталды. Мындай жыйынтык Чүй облустук мамлекеттик монополияга каршы жөнгө салуу бөлүмү жүргүзгөн мониторинг учурунда билингенин Sputnik Кыргызстан агенттигине аталган бөлүмдүн башчысы Азамат Жакыпов билдирди.

Анын айтымында, Чүй облустук мамлекеттик монополияга каршы жөнгө салуу бөлүмү мамлекеттик техникалык инспекция, санитардык эпидемиологиялык станция өкүлдөрү менен бирге кардарлардын укугун коргоо максатында базарга атайын мониторинг жүргүзгөн.

"Мониторинг учурунда базардагы бир топ эрежелер бузулуп жатканын байкадык. Бишкек — Ош жолунун бою өзүнчө базарга айланып кетиптир. Тамак-аш, мөмө-жемиштер сатылып турат. Эки жакка өткөн унаалардан чыккан уулуу заттар келип эле ошолорго тиет. Аны жеп жаткан адамдын ден-соолугу эмне болот, сатуучулар ойлонбойт. Базардын ичинде бош орундар көп эле экен, ошол жакка баарын жайгаштыруу керектигин жергиликтүү бийликке эскерттик. Бул сатуучулардын атайын мыйзамдуу документтери жок болгондуктан жергиликтүү көзөмөлдөө органдары үчүн аларга чара көрүү иштери бир топ оор болуп жатканын айтышты", — деди Жакыпов.

Мындан сырткары, мониторинг учурунда базардын ичиндеги бир катар азыктар текшерилген, анын ичинде эт азыктары да бар.

"Кээ бир жеринен мөөнөтү өтүп кеткен йогурттар сатылып жатканын кездештирдик. Аларды жоопкерчиликке тартабыз. Ошондой эле базарда текшерүү таразалары жок болуп чыкты. Мындан сырткары, сатуучулардын таразаларынын сертификаттарын текшерип чыктык. Айрымдарыныкы жок болсо, кээ бириникинин мөөнөтү өтүп кетиптир. Ал эми эт азыктарын саткан жерде кичине иреттүүлүк бар экен", — деп кошумчалады Жакыпов.

Ошондой эле ал бул жөн гана мониторинг болгондуктан эрежени бузган адамдарга эскертүү берилгенин айтып, эгер алар аткарылбаса айып пул салынарын белгиледи.