Ош ШИИБ: таанышын өлтүрүп, сөөгүн көөмп, изин жашыргандар кармалды

БИШКЕК, 22-ноя. — Sputnik. Ош шаарында 22 жаштагы жигитти өлтүрүп, сөөгүн Кең-Сай конушуна көөмп, изин жашыргандар кармалды. Бул тууралуу Ош шаардык ИИБдин басма сөз катчысы Замир Сыдыков Sputnik Кыргызстан маалымат агенттигинин кабарчысына билдирди. 

Маалыматка караганда, Ош шаардык ИИБдин Кылмыш иликтөө бөлүмүнүн кызматкерлери эки ай мурун өлтүрүлүп, сөөгү Кең-Сай айылына көмүлгөн адамдын ким экендигин аныкташты. Бул кылмышка шектүү жарандар да кармалды. 

Быйылкы жылдын 4-сентябрынан 5ине караган түнү калаа четиндеги Жапалак айылынын 22 жаштагы тургуну Нурсултан Насиров 24:00 чамасында үйүнөн чыгып кеткен бойдон дайынсыз жоголгон. Бул тууралуу Ички иштер башкармалыгына 13-сентябрда жакындары арыз менен кайрылышкан. Ош шаардык ички иштер башкармалыгы күчөтүлгөн тартипте аталган жаранды издөөгө алган. 

Маркумдун сөөгү ушул жылдын 10-октябрында табылган. 

"Сөөк табылган учурда чирий баштаган экен. Иликтөө учурунда маркумду өлтүрүүгө шектүүлөр өзүнүн эле тааныштары экендиги аныкталды", — деп билдирди Сыдыков.

20-ноябрда шектүү эки жаран кармалып, убактылуу кармоочу жайга киргизилген.

"1994-жылы туулган К.Б. аттуу жаран маркумду уруп өлтүрүп алганын, андан соң 22 жаштагы эки жана 23 жаштагы бир жолдошу "Тико" үлгүсүндөгү унаада сөөктү Кең-Сай аймагына алып барып көмгөндүктөрүн айтып берген. Шектүү катары кармалгандар күнөөсүн мойнуна алышты. Алар маркум Насировду пикир келишпестиктен улам өлтүрүп коюшкан", — деп билдирди Ош шаардык ИИБ өкүлү. 

Бүгүн Ош шаардык соту кармалган жарандардын баш коргоо чарасын өзгөртүү маселесин карайт.