БИШКЕК, 30-окт. — Sputnik. Белгилүү публицист, журналист, акын жана жазуучу Алым Токтомушевди эскерүү кечеси өтүп, анда "Балдарга базарлык" китебинин бет ачаары да болот. Бул туурасында "Роза Отунбаеванын демилгеси" эл аралык коомдук фондусунун сайтында кабарланды.
"Токтомушевди анын калемдештери, замандаштары жана шакирттери – Эсенбай Нурушев, Айылчы Сарыбаев, Жаныш Кулмамбетов, Аскер Сакыбаева, Олжобай Шакир эскеришет. Акындын сөзүнө жазылган ырларды Гүлнур Сатылганова, Исрадин Аманбаев баш болгон белгилүү ырчылар аткарышат", — деп айтылат маалыматта.
Маалыматта "Балдарга базарлык" китебин "Роза Отунбаеванын демилгеси" эл аралык коомдук фондусу чыгарганы айтылган.
Алым Токтомушев 1947-жылы Нарын облусунун Жумгал районундагы Кайырма айылында туулган. Узак жылдар бою басма сөз жаатында эмгектенип, "Нуска", "Асаба", "Агым", "Апта", "Алас" гезиттеринде, "Жетимен" журналында иштеген.
Анын "Жолдогулар", "Эски дептер" аттуу ыр жыйнактары, "Салижан Жигитовдун сабактары" жана "Ачылбаган дүйнө" аттуу китептери жарык көргөн. Токтомушев дүйнө адабиятынын алптары Пушкин, Саади, Лермонтов, Пастернак, Рильке, Тардьенин ырларын кыргыз тилине которгон.
