БИШКЕК, 14-окт. — Sputnik. Студенттер үчүн Жусуп Баласагын атындагы президенттик стипендия негизделет. Бул тууралуу президент Алмазбек Атамбаевдин улуу ойчулдун 1000 жылдыгын белгилөө салтанатын карата куттуктоо сөзүндө айтылды.
Атамбаев Жусуп Баласагын Карахандар каганатынын ордосу болгон Баласагын шаарында жарык дүйнөгө келгенин белгилеп, ал Чыгыш мусулман кайра жаралуу доорунун залкар ойчулу, Карахандар каганатынын көрүнүктүү мамлекеттик ишмери, кыргыз жана жалпы тектеш түрк элдеринин тарыхы менен маданиятында өзгөчө орду бар инсан экенине токтолду.
"Жусуп Баласагындын өмүрү жана руханий мурасы азыркы Кыргызстандын аймагы гүлдөгөн цивилизациянын борболорунун бири болгондугун айгинелеп турат. Биз, ошол цивилизациянын мураскерлери, Ала-Тоо койнунда улуу бабабыз жашап өткөнү менен сыймыктанабыз", — деп айтылат куттуктоодо.
"Бул эмгек дүйнө жүзүндөгү акылман-ойчул аалымдары: Конфуций, Лао Цзы, Фирдоуси жана Бабурдун чыгармалары менен бир сапта турат. Ошого байланыштуу залкар бабабыздын 1000 жылдык мааракесинин тарыхый жана маданий зор маанисин эске алып, үстүбүздөгү жыл жалпы түрк дүйнөсүндө Жусуп Баласагындын жылы болуп жарыяланды", — деп айтылат президенттин сөзүндө.
Атамбаев бүгүнкү күндө дагы анын насааттары маанисин жоготпогонун кошумчалады.
"Азыр Кыргызстанга Жусуп Баласагын бабабыздын идеяларын туу туткан, билимдүү жана мекенчил жарандар керек. Ошондуктан өлкөнүн жогорку окуу жайларынын арасынан илимде жаңы ачылыштарды жасап, эң мыкты жетишкендиктерге умтулган студенттерге Жусуп Баласагын атындагы президенттик стипендияны уюштуруу зарыл деп эсептейм", — деп айтылат куттуктоодо.
Сөзүнүн соңунда Атамбаев кыргыз элине ынтымак жана биримдик, тынчтык жана береке каалады.
