Орустарды суктандырган комуз күүсү. Россиянын ТНТ каналындагы "Танцы" телешоусунда кыргызстандык бийчилер Темирлан Назарбеков менен Жан Воинов өз калыстардын оозун ачырды. Өзгөчө Темирландын комуз күүсүнө бийлеген бийи калыстарды өзүнө арбап алды.
Дүйнөнү багындырам. Ырчы Кайрат Примбердиев эми дүйнөнү багындырам деп турган чагы. Аракет кылса ал деле колдон келет. Кайратка ийгилик каалайлы.
Дүйнөнү сулуулук сактайт, же… Кыргызстанда ат тезегин кургатпай өтүп жаткан сулуулук конкурстары тууралуу эмне билесиз. Андан тажаган жоксузбу? Балким сиз ойлогон нерселер тууралуу бул жактан окуп каларсыз.
Эй, Россия, Россия, бир боор энем. Россияда бир мекендешибиз "патриоттордун" токмогунан каза болду деген билдирүү социалдык тармактарда желдей тарады. Маркум аялдын артында эки кызы калган. Окуянын чоо-жайын бул жактан окуңуздар.
Оозуңа кара таш. Октябрь айында Кыргызстанда теракт болушу мүмкүн деген билдирүүнү эми Улуу Британиянын элчилиги билдирди. Дипөкүлчүлүк жарандарын эл көп чогулган жерге барбай, этият болууга чакырды. Буга чейин ушундай эле билдирүүнү АКШнын элчилиги билдирген эле.
Эр уруш. Кыргызстанда ММА боюнча федерация ачылып, анын алкагында беттеш уюштурулат. Мушкерлер жекшемби күнү салмакка түшүп, атаандаштары менен жүздөштү.
Валюта наркы. Бүгүн сомдун баасы долларга карата орто эсеп менен 68.50 (сатып алуу) жана 68.64 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 35.00 сом, Аи-95 үлгүсүндөгү бензин 38.50 сом, ал эми дизель майы 31 сомдон сатылууда.
Соңку сөз ордуна. Өнөрүң болсо өргө чап демекчи элибизде өнөрлүү, таланттуу адамдар көп болуп, өлкөнү даңктап, атын чыгарып жүрө беришсин, деп Расул Үсөналиев.
