БИШКЕК, 9-окт. — Sputnik. Кыргызстандык бийчи Темирлан Назарбеков Россиянын ТНТ каналындагы "Танцы" телешоусунда белгилүү комузчу Нурак Абдрахмановдун "Сары-Өзөк" деген чыгармасына бийлеген.
Калыстардын катарындагы Сергей Светлаков жана Мигель музыка абдан жакканын билдиришти.
"Музыканы туура тандаптырсың. Кишини транска салат экен", — деди Светлаков. Мигель аны коштоду.
Назарбеков 2004-жылдан бери бий менен алектенерин Sputnik Кыргызстан агенттигине билдирди.
"2004-жылдан 2008-жылга чейин кече бийлери — вальс, танго менен алектенгем. Ортодон окуума байланыштуу токтотум койгом. 2011-жылдан тарта заманбап бийлер менен алектенип, бул багытка олуттуу кириштим", — дейт ал.
Назарбеков мектепте окуп жүргөндө комуз ийримине барганын, андыктан комуздун күүсүндө бийлейм деген тилеги мурда эле бар экенин айтты.
Кыргызстандык бийчи "Танцы" телешоусунун тандоосу жазында болуп, программасы жай айларында тартылганын кошумчалады. Ал жакка чет мамлекеттен келген бийчилер да катышкан. Назарбеков теледолбоордун үчүнчү сезонуна Кыргызстандан Жан Воинов экөө өткөнүн айтып, эми конкурстун кийинки турларына билдирүүлөрдү күтүп жатканын кошумчалады.
