БИШКЕК, 16-сен. — Sputnik. Мукаш Абдраев атындагы музыкалык мектептин 10-класстагы окуучусу Жибек Мааданбекова Астанада кыл кыяк боюнча өткөн "Тилеп Аспантай уулу" атындагы эл аралык сынакта биринчи орунду алып келди.
Быйыл биринчи жолу өтүп жаткан сынак 8-10-сентябрь аралыгында Астанада болуп, ага 27 мамлекеттен келген улан-кыздар катышкан.
"Мындай ири масштабдагы сынакка биринчи жолу катышып жатам. Эл жык толгон залда өзүмдү жоготпой күч топтош үчүн алгач эле апамды, эмгектенип маңдай теримди төккөн күндөрүмдү көз алдыма келтирдим", — дейт жеңүүчү Жибек Мааданбекова.
"Астанага баруудан мурда Жибекке форма тиктирүүгө жана жол киреге акча керек болду. Бир нече жерлерге кайрылгандан майнап чыккан жок. Мындан улам Жибектин энеси болгон күчүн жумшап, пенсионер болсо дагы керектүү каражатты топтоп бере алды", — дейт Адышева.
Сынак аяктап жеңүүчүнүн аты аталганда Жибектин энеси Нестан Одурованын көзүнө жаш толгон.
"Астанага өзүм бара албай калгандыктан сынактын жүрүшүн казактардын телеканалынан карап жаттым. Биринчи орунду кызым алганда кубанганыман көзүмөн жаш акты. Көкүрөк күчүгүмдүн ысымы казак телеканалдарынын жаңылыктарынан жаңырганда үмүтүмдүн акталганын сездим", — деп кубанды Одурова.
Жалгыз бой эне кесиби боюнча адабиятчы. Анын айтымында, баланы искусствого жакындатуу менен коомго пайдалуу, көөдөнү кенен балдарды тарбиялоого болот. Одурова бул үчүн каражатты аёо чоң жаңылыштык экенин белгиледи.
Эл аралык сынакта Жибек Мааданбекова 1500 доллар акча менен сыйланды.
