БИШКЕК, 12-сен. – Sputnik. Бүгүн Кыргызстандагы мусулмандар Курман айтты белгилеп, майрамдык намаздар дээрлик бардык аймактарда окулду. Эң көп адам чогулган аймак – Бишкек жана Ош шаарлары болду.
Борбор калаадагы айт намазга премьер-министр Сооронбай Жээнбеков катышып, президент Алмазбек Атамбаевдин кыргыз элин куттуктоосун жеткирди. Борбор калаадагы Эски аянтта миңдеген шаар тургундары менен коноктору майрамдык айт намазга келди.
Ал эми мамлекет башчысы Алмазбек Атамбаев намазга өзүнүн туулган айылы Арашанда жыгылып, андан соң кичинекей балдар менен жолукту. Бул иштерден кийин "Ата-Бейит" мемориалына барып, 2010-жылдын апрель айында жана 1916-жылы Үркүндө каза болгондордун элесин эскерип, куран түшүрдү.
Ош шаарындагы окулган борбордук аянтта Курман айт намазына 10 миңден ашуун адам катышып, шаар башчысы Кадырбаев жалпы мусулмандарды майрамы менен куттуктап, өлкөнүн тынчтыгын тиледи.
Баткендеги кабарчыбыздын билдиргенине караганда, акыркы жылдары айт намаздарга активдүү келгендердин курагы 12-30 жаштын тегерегинде болууда.
Талас калаасындагы борбордук аянтта окулган Курман айт намазына өкмөттүн Талас облусу боюнча ыйгарым укуктуу өкүлү Дайыр Кенекеев катышты. Андан сырткары мусулмандарды шаар мэри Анарбек Кушубеков жана облус казысы Таалай ажы Бапиев куттуктады.
Нарын шаарында борбордук аянтта окулган майрамдык намазга бир нече миңдеген кишинин башын бириктирди. Ага өкмөттүн Нарын дубаны боюнча ыйгарымдуу өкүлү Аманбай Кайыпов баш болгон аткаминерлер катышып, элди куттуктап, андан соң намазга жыгылды.
Бүгүн кыргызстандыктар айт майрамын белгилеп жатат, мындан улам өлкөдө эс алуу деп жарыяланган.
