БИШКЕК, 12-сен. — Sputnik. Курман айттын урматына Ош шаарында “Бекер такси” акциясынын алкагында элди акысыз ташып жатышат. Бул туурасында анын уюштуруучусу Талант Канатбек уулу кабарлады.
Мындай жакшы иш былтыр, 2015-жылы да болгон.
"Быйыл ал жакшы ишти улантууну чечип, майрамдын урматына ары-бери каттагандарды бекер жеткирип жатабыз. Эгерде былтыр мындай сунушка 4 айдоочу макул болсо, быйыл алардын саны 10го жетти. Мындан сырткары дагы эки маршруттук такси иштеп жатат", — деди Канатбек уулу.
Ал Ош шаарынын бир катар жашоочуларынын ичинен бул акцияга шектенүү менен мамиле кылгандар да болгондугун айтты. Буга карабастан, уюштуруучулар аталган акцияны жылына өткөрүп турууга ниеттенип жатышат.
Бүгүн кыргызстандыктар айт майрамын белгилеп жатат, мындан улам өлкөдө эс алуу деп жарыяланган.
