БИШКЕК, 9-сен. — Sputnik. Паралимпиадада алтын медалга ээ болгон кыргызстандык спортчулар 7 миллион сом менен сыйлана турганын Sputnik Кыргызстан агенттигине Жаштар иши, дене тарбия жана спорт боюнча мамлекеттик агенттиктин башчысы Канат Аманкулов билдирди.
Паралимпиада 7-18-сентябрга белгиленген. Кыргызстандан ага Эсен Калиев, Жыргалбек Орозбаев (пауэрлифтинг) жана Арстанбек Базаркулов (жеңил атлетика) катышып жатат.
Өкмөттүн токтомуна ылайык, алтын медаль алган паралимпиадачы жети миллион сом алса, күмүш медалдын ээсине беш миллион сом каралган. Ал эми үчүнчү орунду алган спортчуга 3,5 миллион сом сыйлык берилет.
Төртүнчү орунга эки, бешинчи орунга бир миллион, алтынчыга — 900 миң, жетинчиге — 800 миң жана жетинчи орунга — 700 миң сом бөлүнгөн.
Аманкулов эгер спортчулар медалга жетип калышса, өкмөт менен мэрияга батир бөлүп берүү боюнча сунуш айта турганын белгиледи.
Паралимпиадалык оюндар — майып адамдардын эл аралык спорттук мелдеши. Бардыгы болуп спорттун 22 түрү боюнча медалдын 528 комплектиси ойнотулат.
