БИШКЕК, 6-сен. — Sputnik. Airbus Helicopters II Дүйнөлүк көчмөндөр оюндарынын расмий демөөрчүсү катары уюштуруучуларга H130 үлгүсүндөгү тик учак бергенин ДКОнун катчылыгынан кабарлашты.
Тик учактын экипажы Ысык-Көлдөгү Кырчын жайлоосун, ипподромду жана Чолпон-Атадагы спорт комплексин айланып учат.
Skyland компаниясынын аткаруучу директору Сезим Бексултанова буга чейин өздүк демилге катары чет элдик фирмага кайрылып, аларды Көчмөндөр оюндарына демөөрчү болууга чакырганын билдирди.
"Тик учак Кыргызстанга 1-августта эле келген. Бирок Көчмөндөр оюну бүткөндөн кийин кайра кайтарылып берилет. Тагыраагы, тик учак убактылуу берилген. Катчылык кантип колдонууну өзү чечет", — деп билдирди Бексултанова.
Чолпон-Ата шаарында II Дүйнөлүк көчмөндөр оюндары 8-сентябрга чейин уланат.
Көчмөндөр оюндарына спорттун 26 түрү боюнча оюндар киргизилген. Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиа өнөктөшү.
