БИШКЕК, 2-сен. — Sputnik. 1916-жылдагы окуя тууралуу айрым архивдик материалдар быйыл гана алынганын президент Алмазбек Атамбаев кайгылуу окуяда каза болгондорго арналган мемориалдын ачылышында билдирди.
Анын айтымында, тарыхтагы бул кайгылуу окуялар тууралуу айтуу оор.
"100 жыл өткөнүнө карабастан архивдик материалдардын бардыгын эле алуу мүмкүн эмес. Биринчи маалыматтар толук изилдене элек. Алардын айрымдарын биздин окумуштуулар быйыл гана алды", — дейт Атамбаев.
"Көтөрүлүш падышачылыктын колониялык саясатына багытталган. Бул кайгылуу аракеттер Россия падышачылыгын өзүндөгү прогрессивдүү күчтөрдүн активдүү кийлигишүүсү менен соңуна чыккан", — дейт президент.
Атамбаев 1916-жылдагы кайгылуу окуя көп кылымдар бою болуп келген пикир келишпестик, ички ыйкы-тыйкы аракеттер жана биримдиктин жоктугунан чыккан мыйзам ченемдүү нерсе экенин белгиледи. Бул тарыхтагы эң оор учурлар экенин кошумчалады.
