БИШКЕК, 24-авг. — Sputnik. Кытайдан келген маданият жана шериктештик кербенин Кыргызстанда жолду катар жоокерлер коштоп жүрөт. Бул тууралуу Маданият, маалымат жана туризм министрлиги билдирди.
Төө, ат минген "орто кылымдын соодагерлери" Пекинден 2014-жылы чыккан. Сапардын акыркы чекити Рим шаары болуп эсептелет. Ал жакка кербен Жибек Жолу менен 2019-жылы жетери күтүлүүдө.
"Кыргызстандын аймагында — Чүйдөгү Ленин айылынан баштап Баткенге чейин кербенди нукура кыргыз жоокерлери коштоп жүрөт", — деп айтылат билдирүүдө.
Конгон жеринде соодагерлер кытай салты боюнча чай аземдерин өткөрүп турушат. Эң эле салтанаттуусу Көчмөндөр оюнунун алкагында Кырчын жайлоосуна болору күтүлүүдө.
