БИШКЕК, 8-авг. – Sputnik. Казакстандын премьер-министринин орун басары Дарига Назарбаева илимий изилдөө иштерин жүргүзүү максатында кара куурайды пайдаланууга ишканаларга уруксат кылган лицензия берүүнүн ачык, айкын механизмдерин тереңдетүү боюнча тапшырма берди. Бул туурасында Новости-Казакстан сайты кабарлады.
Өнүгүү жана инвестиция боюнча министринин орун басары Альберт Раунун айтканына караганда, кара куурайды кайра иштетүүнүн схемасы сунушталып, андагы баңги заттар топтолуп калган күнжараны жок кылуу айтылган.
"Жыйындын жүрүшүндө Дарига Назарбаева тиешелүү мамлекеттик органдарга өндүрүш ишканаларына кара куурайды айлантуу жана аны илимий жаатта пайдалануу үчүн сапаттуу, ачык-айкын механизмдерди киргизип, аларга лицензия берүүнү тапшырды", — деп айтылат маалыматта.
Назарбаева бул ишти Баңгизаттарга көзөмөл кылуу боюнча эл аралык комитет менен биргеликте, БУУнун Конвенциясын көңүлгө алуу менен жүргүзүүнү белгилеген.
Кеңешменин катышуучулары баңгизаты жок кара куурайды өстүрүү боюнча башталган сынамык долбоордун жол картасы боюнча маалымат угушту.
"Аталган долбоордун алкагында Казакстандын тарыхында биринчи ирет айыл чарбасында Түштүк Казакстан, Алматы, Караганда жана Түндүк Казакстан аймагына кара куурайдын үрөнү себилген. Тажрыйба жүргүзүп, кара куурайды кайра иштетүүнүн технологиясын иштеп чыгуу үчүн түшүм АКШ, Германия, Кытай жана Бельгияга жөнөтүлөт", — деп айтылат маалыматта.
Назарбаева муну менен катар техникалык кара куурайдан алынган кагаздын баасынын төмөндүгүн белгилеген.
"Казакстандын өзүнүн өндүрүп чыккан кагазы жок. Бардыгын сырттан сатып алгандыктан, ал кымбат турат. Казакстандын өзүнүн кагазын чыгарган заводду куруу азыркы учурдун талабы болуп турат. Бул басылмалар үчүн да маанилүү", — деген ал.
Кеңешменин жыйынтыгында Назарбаева кара куурайды өндүрүү мамлекеттик катуу көзөмөлдө боло тургандыгын кошумчалаган.
