БИШКЕК, 27-июл. — Sputnik. Россиянын Иркутск облусунда 10 килограммга чукул героин алып бараткан 22 жаштагы кыргызстандык жаран кармалды. Бул тууралуу Баңгизатка каршы күрөшүү боюнча мамлекеттик кызмат билдирди.
Маалыматка ылайык, 25-июлда Ангарск шаарынан Усолье-Сибирское калаасына бараткан унаа токтотулуп, андан жүргүнчү катары отурган кыргызстандык жаран тинтүүгө алынган. Текшерүү учурунда анын жанынан 9 килограмм 853 грамм героин табылып, ал баңгизатты сатууга алып баратканын айткан.
Бул факты боюнча РФтин кылмыш жаза кодекси боюнча кылмыш иши козголуп, учурда тергөө амалдары жүрүп жатат.
Россиянын мыйзамы боюнча ири көлөмдөгү баңгизатты сактап, алып жүргөнү үчүн 15-20 жылга чейин эркинен ажыратуу каралган.
