БИШКЕК, 30-июл. — Sputnik. "Кара куурай" рейдинин алкагында 125 тонна жапайы кара куурай жок кылынганын Ички иштер министрлиги кабарлады.
ИИМдин маалыматына караганда рейд 18-22-июль аралыгында өткөн. Баңгизат өсүмдүгүн жок кылууга 900дөн ашык милиция кызматкерлери менен тургундар катышкан.
"209,3 гектар жерден жалпы салмагы 125 тонна 985 килограмм жапайы кара куурай жок кылынды", — деп айтылат маалыматта.
Муну менен катар рейд учурунда баңгизатка байланыштуу 26 кылмыштын бети ачылып, 232 килограмм баңгизат сатыктан алынган.
