БИШКЕК, 28-июл. — Sputnik. Саадат Асылбекова аттуу 16 жашар кыз "Бикини сулуусу — 2016" наамын жеңип алды. Бул тууралуу Sputnik Кыргызстан агенттигинин кабарчысына уюштуруучу Амина Юсурова билдирди.
Кыздар арасында өткөн таймаш кечээ болуп өттү. Ага 16 жаштан 28 жашка чейинки сулуулар катышкан.
Сынак учурунда катышуучулар бийчилик өнөрлөрүн көрсөтүү менен шаан-шөкөткө арналган көйнөк жана бикини кийип чыгышкан.
"Кыздарды тандоо сынагы бир айга созулду. Өлкөдө жарандардын көпчүлүгү эле мындай сынактарга терс пикирде. Менин жеке студиям бар. Кыздардын ата-энелери мага ишенет. Талаптар абдан катуу болду. Катышуучуларды эл аралык нормаларга ылайык тандадык. Кыздардын бойлору 174 сантиметрден жогору", — деп билдирди Юсурова.
Жеңүүчү кыз "Бикини сулуусу" Universal эл аралык сынагына катышат. Юсурова аталган сынак сентябрь айында Кытайда өтө тургандыгын кошумчалады.
