БИШКЕК, 13-июль. — Sputnik. Кечээтен тарта 16-июлга чейин Талас районунун айыл өкмөттөрүндө маданият күндөрү өтөт. Бул туурасында Тарых жана маданият жылын өткөрүү боюнча Мамлекеттик дирекциянын маалымат кызматынан кабарлашты.
Алгач, иш-чара Бекмолдо айыл аймагындагы Сасык-Булак айылдык маданият үйүндө башталып, Хан Бүргө орто мектебинин окуучулары "Үркүндүн 100" жылдыгына карата жазуучу Мукай Элебаевдин "Узак жол" чыгармасы боюнча сценка коюшту.
Бүгүн Осмонкулов айыл аймагынын Талды-Булак айылында жаш манасчылардын кароо сынагы өтөт.
14-июлда Көпүрө-Базар айылындагы китепканада Тайлак баатырдын 220 жылдыгына карата иш-чара өткөрүлсө, 15-июлда маданият күндөрү Көк-Ой айылында "Ыр кесе" майрамы менен уланат. Дубандагы маданият күндөрү Талас райондук борборлоштурулган китепканада жыйынтыкталат.
