БИШКЕК, 12-июл. — Sputnik. Кыргызстанда Тарых жана маданият жылынын алкагында жаш жазуучулардын "Мекенге таазим" аттуу I адабий фестивалы өтөт. Бул туурасында Тарых жана маданият жылын өткөрүү боюнча мамлекеттик дирекциянын маалымат кызматынан билдиришти.
Тарых жана маданият жылын өткөрүү боюнча мамлекеттик дирекциянын жетекчиси Султан Раевдин айтымында, акыркы 25 жыл ичинде жазуучулар арасында мындай адабий фестиваль биринчи жолу өтүп жатат.
"Мекенге таазим" адабий фестивалын бир жолу эмес жылына өткөрүүнү салтка айландыруубуз зарыл. Бул фестиваль бийик деңгээлде өтүп, лауреттардын китептерин басып чыгарууга колдоо көрсөтөбүз", — деди Раев.
Кыргызстан Жазуучулар союзунун төрагасы Акбар Рыскулов "Мекенге таазим" адабий фестивалы жаш жазуучуларга чоң таасир берет деген пикирин билдирди.
Фестивалдын программасында жогорку окуу жайлардын студенттери менен адабий жолугушуулар бар. Андан сырткары поэзия кечелери болуп, анын алкагында поэзия, проза, орус адабияты, котормо, драматургия, балдар адабияты жанрлары боюнча онго жакын секция иш алып барат.
