БИШКЕК, 4-июл. — Sputnik. Кыргызстанда мамлекеттик герб менен желекти даярдоонун стандарттуу ыкмасын пайдалануу сунушталып жатат.
Айрым депутаттар коомдук талкууга "Кыргыз Республикасынын мамлекеттик символдору тууралуу" мыйзамына өзгөртүүлөрдү алып чыгышкан.
Демилгечилер бүгүнкү күндө символдордун анык бир эталону жок экенин жүйө келтиришүүдө. Герб менен желек ар кандай вариантта даярдоого жол берилип, бирдиктүү талап коюлган эмес.
Депутаттардын айтымында, символикалардын эталону жалпыга жеткиликтүү болушу керек. Мында анын стандарттарын өкмөт иштеп чыгышы кажет. Мыйзам долбоордо азыркы мыйзамда өкмөттүн мындай укугу жок экени белгиленген.
