БИШКЕК, 28-июн. – Sputnik. Депутаттар Айнуру Алтыбаева менен Наталья Никитенко мандатын тапшырган айым депутаттын ордуна кезекте турган айым келиши керек деген мыйзам долбоорун коомдук талкууга койду.
Демилгеге ылайык, мандатын тапшырган адам кайсыл жыныста болсо, ордуна ошол жыныстагы адам келиши керек.
Демилгечилер бул кадамын аял депутаттардын ордуна эркектердин келип жатышы менен түшүндүрүшүүдө.
Sputnik Кыргызстан агенттиги бул ирет мандатынан кол жууган айымдардын ордуна келген мырза депутаттарды тизмектеп көрдү.
Ишке киришип-киришпей жатып "Кыргызстан" фракциясынан мандат алган Элмира Жумалиева менен Чолпон Эсенамановалар депутаттык креслодон кол жууган. Көп өтпөй эле алардын ордун аталган партиядан Алмаз Токторов менен Урматбек Самаев басты.
Андан соң вице-спикер Бакыт Есенбаева өз ыктыяры менен мандатын тапшырып, ордуна "Бир Бол" фракциясынан Бакирдин Субанбеков келген.
Алты ай гана депутат болгон Лунара Мамытова өз ыктыяры менен мандатын тапшырганын социалдык тармакка жазып, ордун Улукбек Ормоновго бошоткон.
Эркектердин ордуна келген аялдар
КСДП фракциясынан мандат алган Акылбек Султанов депутаттык креслосун Альфия Самигуллинага бошотуп берсе, Мамлекеттик экологиялык жана техникалык коопсуздук боюнча инспекцияны жетектеп кеткен Канатбек Муратбековдун ордуна Таалайгүл Исакунова келген.
