БИШКЕК, 7-июн. — Sputnik. Мухаммед Алинин табытын акыркы жайга жума күнү актер Уилл Смит жана бокс боюнча дүйнөнүн экс-чемпиону Леннокс Льюис көтөрүп барат. Бул туурасында РИА Новости Франс-пресс агенттигине шилтеме кылып кабарлады.
Америкалык актер дүйнөлүк легенданын ролун 2001-жылы Майкл Манндын "Али" тасмасында ойногон. Бул ролдон кийин Смит мушкер Мухаммед Али менен жылуу мамилесин үзгөн эмес.
Британиялык жана канадалык спортчу Льюис акыркы 25 жыл ичиндеги эң мыкты мушкерлердин бири болуп келе жатат. Ал 1990-2000-жылдары дүйнөлүк титулдардын көбүн жеңип алган.
Мухаммед Али 10-июнда жерге берилет жана аны акыркы сапарга узатууга каалаган адамдар катышып, коштошо алат.
Али 75 жашында Аризона штатындагы ооруканаларынын биринде бир нече күн ооруп жаткандан кийин көз жумган.
Мухаммед Али — Олимпиада оюндарынын жеңүүчүсү, оор салмакта дүйнөнүн абсолюттук чемпиону (1964-1966-ж.ж., 1974-1978-ж.ж.), WBC версиясы боюнча дүйнө чемпиону (1974-1978-ж.ж.), WBA версиясы боюнча дүйнө чемпиону (1967-ж., 1974-1978-ж.ж., 1978-ж.). "Ринг" журналы беш ирет "Жылдын мушкери" атаган (1963, 1972, 1974, 1975, 1978). Мындан сырткары, аталган журнал Алини "Он жылдыктын мушкери" атаган (1970). 1999-жылы Sports Illustrated менен BBC Алини "Кылымдын спортчусу" атаган. Ал спорттук карьерасын аяктагандан кийин ЮНИСЕФтин ыктыярдуу элчиси болуп (1998-2008-ж.ж.) да иштеген.
