БИШКЕК, 5-июн. — Sputnik. Легендарлуу мушкер Мухаммед Али акыркы жайына 10-июнда Американын Кентукки штатында Луисвилл шаарынан узатылат. Бул туурасында РИА Новости спортчунун үй-бүлөсүнүн расмий өкүлүнүн айтканын билдирди.
Белгилүү мушкер Али 3-июнда Американын Финикс шаарында каза болду. Ал андан ьир күн мурда дем алуусу начарлап, ооруканага жаткырылган.
74 жаштагы Али дүйнөнүн абсолюттук чемпиону, олимпиада оюндарынын жеңүүчүсү. Ал Паркинсон оорусу менен 1984-жылдан бери жабыркап келген.
"Али жума күнү Луисвилл шаарында жерге берилет. Аны менен коштошууга келгендер үчүн эшик ачык", — деп билдирген Рейтер агенттигине спортчунун үй-бүлөсүнүн расмий өкүлү.
Мухаммед Али — Олимпиада оюндарынын жеңүүчүсү, оор салмакта дүйнөнүн абсолюттук чемпиону (1964-1966-ж.ж., 1974-1978-ж.ж.), WBC версиясы боюнча дүйнө чемпиону (1974-1978-ж.ж.), WBA версиясы боюнча дүйнө чемпиону (1967-ж., 1974-1978-ж.ж., 1978-ж.). "Ринг" журналы беш ирет "Жылдын мушкери" атаган (1963, 1972, 1974, 1975, 1978). Мындан сырткары аталган журнал Алини "Он жылдыктын мушкери" атаган (1970). 1999-жылы Sports Illustrated менен BBC Алини "Кылымдын спортчусу" атаган. Ал спорттук карьерасын аяктагандан кийин ЮНИСЕФтин ыктыярчы элчиси болуп (1998-2008-ж.ж.) да иштеген.
