БИШКЕК, 12-май — Sputnik. "Тайлак баатыр" туурасында тартыла турган толук метраждуу кинотасма боюнча үч автордун сценарийин эксперттик топ жактырды. Бул туурасында Кинематография департаментинин маалымат кызматы билдирди.
"Тарых жана маданият жылына карата өкмөттүн тапшырмасы менен Кинематография департаменти "Тайлак Баатыр" тасмасынын сценарийине сынак жарыялаган. Эксперттик топ конкурска келип түшкөн Садык Шер-Нияз, Каныбек Иманалиев жана Бакыт Турдубаевдер жазган сценарийди жактырды",— деп айтылат маалыматта.
Талкуунун жүрүшүндө сценарийдин авторлоруна көркөмдүк, тарыхый жана саясий жактан сын-пикирлер, сунуштар айтылып, авторлор тарабынан кошумчалана турган болду.
Сынакка келип түшкөн жалгыз сценарийдин авторлорунун экөө Садык Шер-Нияз менен Каныбек Иманалиев учурда Жогорку Кеңештин депутаттары. Садык Шер-Нияз менен дагы бир автор Турдубаев "Курманжан Датка" тасмасынын жаратуучулары.
