БИШКЕК, 6-май – Sputnik. Сириянын Пальмира шаарында коюлган Мариинск театрынын симфониялык оркестринин концерти калаа коргоочуларынын, анын ичинен курман болгон россиялык офицер Александр Прохоренконун жаркын элесине арналды.
Байыркы амфитеатрдын аянтчасында композиторлор Иоганн Себастьян Бах, Сергей Прокофьев жана Родион Щедриндин чыгармалары жаңырды. Музыканттар менен угармандарга Россия президенти Владимир Путин түз эфир аркылуу кайрылды. Ал концерт терроризм менен күрөшкөндөргө урмат-сый жана анын курмандыктарынын элесине таазим экендигин айтты.
ЮНЕСКОнун тизмесине киргизилген Пальмира шаары "Ислам мамлекети" террордук уюмунун колунда бир жылга жакын кармалып турду. 27-мартта
Сирия өкмөтүнүн аскерлери Россиялык аскерий күчтөрдүн көмөгү менен аталган калааны согушкерлеринен толугу менен бошоткон.
Бүгүнкү күндө Пальмиранын тарыхый бөлүгүнүн 80 пайызга жакыны сакталып калды. Эксперттер шаарды калыбыга келтирүүгө беш жылга чукул убакыт кетет деп эсептешет.
