БИШКЕК, 30-апр. — Sputnik. Борбордук шайлоо комиссиясы Лунара Мамытованын депутаттык мандатын тапшыруу боюнча жазган арызын бир жумадан кийин каралышы мүмкүн. Бул туурасында БШКдан Sputnik Кыргызстан маалымат агенттигине билдиришти.
"Бир Бол" партиясынан депутат болуп келген Мамытова мандатын тапшыра турганын кечээ билдирген болчу.
"Өз каалоом менен депутаттык кызматтан кетүү туурасында арызымды жаздым. Мен үчүн Адам бойдон калуу — башкы максат! Кресло үчүн өлбөйм! Саясий чөйрөсүндө аз убакыт болсом да, саясаттын чыныгы жүзүн биле алдым. Депутаттык ишмердигимде саясатчыларга көңүлүм калган учурлар болду. Саясатта бул кадимки көрүнөш. Албетте саясий чөйрөдө мен сыймыктанган адамдар бар", — деп өзүнүн Facebook баракчасына жазган.
БШКга Мамытованын арызы келип түшкөн, бирок алар бүгүн ишемби күнү жыйынга чогулбай турганын билдирди.
"Майрамдык эс алуудан кийин, 6-майда саат 15.00дө БШК мүчөлөрүнүн жыйыны болот. Балким ошондо депутаттын мандат тапшырган маселеси каралышы ыктымал", — деп маалымат кызматтан билдиришти.
Лунара Мамытова 2015-жылы VI чакырылышта "Бир Бол" партиясынын тизмеси менен депутат болуп келген. Буга чейин ал КТРКнын журналисти болуп иштеген.
