БИШКЕК, 25-апр. — Sputnik. Конституциянын 41-беренеси БУУ комитетинин чечиминин негизинде эгер Азимжан Аскаров сотко арыз менен кайрылса анын кылмыш ишин кайрадан карап чыгууну талап кылат. Бул тууралуу Жогорку соттун төрайымы Айнаш Токбаева журналисттердин суроосуна жооп берип жатып билдирди.
Эскерте кетсек, 21-апрель күнү Бириккен улуттар уюмунун Адам укуктары боюнча комитетинин эксперттери улут аралык мамилелерди козуткан деген айып менен эркинен ажыратылган Азимжан Аскаровду бошотуу жана аны күнөөлүү деп тапкан чечимди жокко чыгарууну талап кылган докладын жарыялаган.
"БУУнун адам укуктары боюнча комитетинин чечими мыйзам боюнча милиция кызматкерин өлтүрдү деп табылган Азимжан Аскаровдун ишин кайра чыгууга милдеттендирет", — деди Токбаева.
Конституциянын 41-беренесинин 2-пунктуна ылайык, ар бир жаран эл аралык келишимдердин негизинде бузулган укугун коргоо үчүн эл аралык органдарга кайрыла алат. Эгер аталган органдар тигил же бул жарандын укугунун бузулушун аныктаса, Кыргызстан аны калыбына келтирүүгө милдеттүү болот.
Токбаева БУУ Комитетинин чечими Аскаровго анын кылмыш ишин жаңы өңүттө карап чыгуу арызы менен кайрылууга укук бере турганын белгилейт.
"Ал эми сот иштин бардык тарабын иликтеп жана Комитеттин чечимин эске алуу менен чечим чыгарат", — деди ал.
Июль айында (2015-жылы) АКШнын мамлекеттик департаменти тарабынан Азимжан Аскаровго "Адам укугунун коргоочусу" сыйлыгынын ыйгарылышы Кыргызстанда нааразычылыкты жараткан.
Ага жооп иретинде Кыргызстан АКШ менен 1993-жылдын 19-майында кол коюлган кɵмɵк кɵрсɵтүүнү жеңилдетүү боюнча кызматташуу келишимин бир тараптуу жокко чыгарган.
