БИШКЕК, 22-апр. — Sputnik. Украинанын Кыргызстандагы элчилиги КР жарандарын Крымга жумушка орноштурууга көрүлгөн аракеттер боюнча билдирүү жасап, анын текстин өзүнүн сайтына жайгаштырды.
Буга чейин КР Мамлекеттик миграция кызматы "Ялта-Интурист" мейманкана комплексинде туристтик сезондо кыргызстандыктарды жумуш менен камсыздоо боюнча сүйлөшүүлөр болуп жатканын билдирген.
Маалыматта Украинанын убактылуу басылып алынган аймагына чет элдиктердин кирип-чыгуусу үчүн өлкөнүн мамлекеттик миграция кызматынын атайын уруксат берүүчү документи талап кылынары айтылат. Ошондой эле аталган аймакка кирип-чыгуу эрежесин бузган жарандар Украинанын мыйзамдарына ылайык, жоопко тартылары эскертилет.
"Мамлекеттик миграция кызматынын КР жарандарын Украинанын убактылуу басып алынган аймагындагы жерге ишке орноштуруу боюнча жасап жаткан аракетин достук эмес мамиле катары кабылдайбыз. Бул кадам Украина менен Кыргызстандын ортосундагы өнөктөштүк жана ишенимдүү кызматташтыкка туура келбейт", — деп айтылат билдирүүдө.
Элчилик ошондой эле, "Россия Федерациясы менен жетишилген сүйлөшүү убактылуу басып алынган Крым аймагын жана Севастополду эл аралык жактан "мыйзамдаштырып", аны Россиянын бир айамгына катары таанууга болгон аракет катары колдонулушу мүмкүндүгүн" айтат.
