Кыргызстандык студент БУУнун Москва эл аралык модели иш-чарасына катышууда

БИШКЕК, 19-апр. — Sputnik. Красноярск шаарындагы Сибирь Федералдык университетинин студенти Асел Сартпаева Бириккен Улуттар Уюмунун (БУУ) Москва эл аралык модели иш-чарасына катышууда. Бул тууралуу "Замандаш" ассоциациясы билдирди.

Маалыматка ылайык, аталган иш-чара 17-22-апрелде Москва шаарында өтүп жатат. Ага дүйнө жүзүнөн 700дөн ашык катышуучу келген. Алар БУУнун түрдүү органдарынын —Башкы ассамблея, Коопсуздук кеңеши, экономикалык жана социалдык кеңеш, Эл аралык сот, Адам укуктары боюнча кеңеш сыяктуу түрдүү түзүмөрдүн ролун аткарышат. 

Бул иш-чарада эл аралык миграция, терроризмдин алдын алуу жолдору, расизимди жок кылуу сыяктуу маселелер талкууланат.

Сартпаева бул иш-чарага катышып жатканына бактылуу экенин айтат.

"Мен бул иш-чарага катышып жатканыма абдан кубанычтамын. Красноярскинин коомдук дипломатия мектеби мени БУУнун Красноярск моделине катышуу үчүн делегациянын курамына былтыр киргизген. Биз ал жактан жеңишке жеткенбиз. Красноярскиден алты киши катышууда", — дейт ал.

Сартпаева аталган иш-чарага Кыргызстандын атынан катышып жатканын кошумчалады.