Бул экзамен жаш жоокерлерди 2016-жылдагы окуу жылга даярдоо планынын алкагында өттү. Алар аскердик атрибуттардан болгон – жашыл беретке ээ болуу үчүн катаал сыноолорго чыдашы керек. Ал үчүн дене бой, моралдык-психологиялык жактан даярдыктан өтүп, аскер иштери боюнча теориялык билимин бекемдеши шарт.
Токмок шаарындагы полигондо жаш жоокерлер үчүнчү, акыркы этапты өтүштү. Аскердик буюм-тайымдары, куралдары менен кошо дөңсөөлөргө чуркап чыгып, кайра түшүп 10 чакырымга чейин жол басышы керек. Автомат менен бутага тийгизе атып, аны көз ачып-жумганча чачып жана курашы зарыл. Ар кандай кырдаалда жол таап, коркунуч жараткан душманын жеңе билип, андан сырткары радиобайланыш менен тиешелүү маалыматтарды берип турууга милдеттүү.
Сыноодон татыктуу өткөн жоокерлерге 9-апрелде салтанаттуу түрдө эңсеген жашыл береттери тапшырылат. Башкы штабдан жашыл берет кармашка кирүүгө ардактуу укук берген атрибуттардын башында турат деп билдиришти.
