Өкмөт: чек арадагы кырдаал менен Үңкүр-Тоо маселесинин байланышы жок

© Фото / SputnikҮңкүр-Тоо. Архив
Үңкүр-Тоо. Архив - Sputnik Кыргызстан
Жазылуу
Үңкүр-Тоо маселеси эки өлкөнүн Чек ара кызматынын жетекчилеринин жолугушуусунда талкууланган жок.

БИШКЕК, 26-мар. — Sputnik. Өзбекстан кыргыз-өзбек чек арасына аскер техникасы менен жоокерлерин Нооруз майрамына карата коопсуздук чараларын күчөтүү максатында жайгаштырганын дагы бир ирет кайталады. Бул тууралуу өкмөттүн чек ара маселелери боюнча атайын өкүлү Курбанбай Искандаров маалымат жыйында билдирди.

Өкмөт: Өзбекстан техникасы менен аскерин эч кандай шарт койбой эле алып чыкты
Буга чейин жергиликтүү кеңештин депутаттарына таянуу менен айрым маалымат каражаттарында жана Интернет айдыңында "Кербен" мунарасын башка жакка көчүрүп, станция жайгашкан Үңкүр-Тоо Өзбекстандын карамагына өтөт деген маалымат тарап кеткен.

Өкмөт станцияны көчүрбөй турганын, аталган аймакты Өзбекстанга бербей турганын билдирген. Муну менен бирге министрлер кабинети Үңкүр-Тоону Өзбекстанга берүү боюнча эч кандай токтом чыгарбаганын белгилеген.

"Чек арадагы кырдаалдын себептери боюнча божомолдор ар кыл. Анын бири Нооруз майрамына байланыштуу. Майрам аяктагандан кийин өзбек тарап техникасы менен аскерлерин алып чыгып кетти", — деди Искандаров.

Анын айтымында, Үңкүр-Тоо маселеси эки өлкөнүн Чек ара кызматынын жетекчилеринин жолугушуусунда талкууланган эмес.

Эскерте кетсек, Өзбекстандын демилгеси менен болуп өткөн сүйлөшүүлөрдүн жыйынтыгы менен Чала-Сарт аймагынан 18-марттан бери турган Өзбекстандын аскер техникасы менен жоокерлери чыгарылды.

Кыргыз-өзбек чек арасындагы түзүлгөн кырдаалдын келип чыгуусун жана башка күңгөй-тескейин Sputnik Кыргызстан агенттиги даярдаган материалдан окуңуз>>

Жаңылыктар түрмөгү
0
Алгач жаңыларыАлгач эскилери
loader