БИШКЕК, 24 мар. — Sputnik. Жалал-Абаддын Аксы районунун Чаласарт аймагындагы өзбек тараптын аракетин Кыргызстанга басып кирүү катары баалай турганын өкмөттүн чек аралар боюнча атайын өкүлү Курбанбай Искандаров маалымат жыйында билдирди.
Искандаров өз сөзүндө кыргыз-өзбек чек арасында мындай макулдашылбаган 58 аймак бар экенин айтып, делимитация иштери аяктаганга чейин эч бир тарап өз алдынча кандайдыр бир көзөмөл өткөрүү жайларын кое албай турганын кошумчалады.
"Сузак районунда Тешик-Таш аймагында 76 гектар жер бар. Бардык документтер боюнча бул аймак бизге таандык. Аталган аймакка өзбек тарап траншеяларды казып, тикенек зымдарды тосуп алып, айдоо жерлерин колдонуп жатат", — деди ал.
Искандаров Ноокен районундагы Ношкен деген жерди да коңшу мамлекет колдонуп келерин кошумчалап, делимитация учурунда аталган жер Кыргызстанга кайтарылышы керектигин баса белгиледи.
