БИШКЕК, 16-мар — Sputnik. Кыргызстан шайлоо өнөктүгүн ачык-айкын өткөрө алган аймактагы уникалдуу өлкө. Бул тууралуу Чехия парламентинин депутаттар палатасынын төрагасы Ян Гамачек президент Алмазбек Атамбаевдин кабыл алуусунда билдирди.
Өлкө башчы бүгүн Кыргызстанга расмий сапар менен келген чехиялык депутаттардын делегациясын кабыл алып, аталган сапар эки өлкөнүн ортосундагы мамилени өнүктүрүүгө түрткү болоруна ишеним артты.
"Эки өлкөнүн ортосундагы достук мамиле СССР мезгилинде эле бекем түптөлгөн. Чехия Кыргызстандагы өнөр жайды өнүктүрүүгө зор салым кошкон", — деди президент.
Өз кезегинде Ян Гамачек өлкө башчынын жылуу кабыл алуусу үчүн ыраазычылык билдирип, парламенттер аралык кызматташууну өнүктүрүү зарылдыгын белгиледи. Ошону менен бирге ал Кыргызстан шайлоо өнөктүгүн ачык-айкын өткөрө алган аймактагы уникалдуу өлкө экенин кошумчалады.
Жолугушууда Экинчи кыргыз-чехиялык бизнес-форумдун соода-экономикалык кызматташууну өнүктүрүүдөгү маанилүү орду белгиленди.
