БИШКЕК, 9-мар. – Sputnik. Шейшемби күнү Жол кайгуул милициясынын атайылаштырылган батальонунун (ЖКМАБ) инспекторун унаа коюп кеткенин аталган мекеме билдирди.
"Бул Жол кайгуул кызматынын эмес, ЖКМАБнын кызматкери", — дешти Бишкек ШИИБнын Жол кайгуул кызматы.
Кырсык "Дордой" жаңы конушунун аймагындагы Элебесов көчөсүндө болгон. ШИИБдин маалымат кызматы азырынча эч кандай түшүндүрмө бере элек. Тез жардам кызматы автокырсык болгонун тастыктады.
"30 жаштагы милиция кызматкеринин баш мээси чайкалып, ички органдары жабыркаган. Мындан тышкары, жамбаш сөөктөрү сынган. Ал Бишкек травматология жана ортопедия илим-изилдөө борборуна жаткырылды", — дешти Тез жардам кызматынан.
Азырынча кырсыкка себепкер айдоочу из жашырбаганы белгилүү болду. Башка маалымат айтыла элек.
