БИШКЕК, 5-мар. — Sputnik. Коммуналдык кызматтардын жети түрү үчүн берилүүчү бирдиктүү квитанция Бишкекте жылдын аягына чейин пайда боло турганын Sputnik Кыргызстан агенттигине Мамлекеттик каттоо кызматынын төрага орун басары Дастан Догоев билдирди.
Каттоо кызматы менен шаардык мэриянын биргелешкен долбоору бирдиктүү мамлекеттик реестр менен дарек регистринин негизинде бирдиктүү билинг (эсеп көрсөткүчү) системасын түзүүнү сунуштайт.
"Коммуналдык системалардын эсеп көрсөткүчүн бириктирүү каралган. Бирдиктүү квитанция калк үчүн жеңилдик түзөт. Эсепти мурдагыдай эле төлөм системалары же почта бөлүмдөрү аркылуу жүргүзүүгө болот", — дейт Догоев.
Анын айтымында, макулдашууга кол коюу калды, андан кийин аны ишке ашыруунун мөөнөтү белгиленет.
"Мэрия бул саамалыкты алгач шаар райондорунун биринде пилоттук долбоор катары сынап көрүүнү сунуштады", — деди төрага орун басары.
Квитанцияга газ, электр энергиясы, ысык жана муздак суу, лифт, жылуулук жана таштанды чыгаруу сыяктуу жети кызматтын эсеби киргизилмекчи.
